ಅಲೆವ ದುಂಬಿ

ಚಿತ್ರಕೃಪೆ : ಅಂತರ್ಜಾಲ 

 

ಕಣ್ಣ ತುಂಬ ಹಸಿರು ತುಂಬಿ 

ಮನಸು ಈಗ ಅಲೆವ ದುಂಬಿ!

ಜೀಪು ಹತ್ತಿ ಕುಳಿತೆವು..

ಅಗ್ಗು ತಗ್ಗು ಜಿಗಿದವು!!.

ಧೂಳು ದಣಿವು ಅಂಟಲಿಲ್ಲ 

ಕೂಡಿ ನಡೆದು ಮರೆತೆವೆಲ್ಲ!!

ಗಿರಿಯ ತುದಿಯ ಹಾದಿಯಲ್ಲಿ 

ತಂಪು ಗಾಳಿ ಸೋಂಕಿದೊಡನೆ 

ನೀಲಿ ಬಾನು ಕೆಳಗೆ ಇಳಿದು,

ಮಿನುಗು ಭಾನು ಕಣ್ಣ ಹೊಡೆದು,

ಸನ್ನೆಯಲ್ಲೇ ಎಲ್ಲರನ್ನು ಬಳಿಗೆ ಕರೆದನು 

ಸ್ವರ್ಗದಂಚಿನಲ್ಲಿ ನಮ್ಮ ಬಿಟ್ಟು ಹೋದನು!!

ಸಗ್ಗದಿಂದ ಕೆಳಗೆ ಇಳಿದು,

ಗಂಗೆಯೊಲವ ಅರಸಿ ನಿಂತು,

ಹರಿವ ಜಲದ ಮೂಲ ಅರಸಿ ಹೋದೆವಲ್ಲಿಗೆ!

ಕೊರೆವ ನೀರ ಗರ್ಭದಲ್ಲಿ ಜಿಗಿದೋ ಮೆಲ್ಲಗೆ!!

ಜಾರೋ ಬಂಡೆ, ಚೂಪು ಕಲ್ಲು ಪಾದಗಳಿಗೆ ವೇದನೆ,

ಶೀತ ಶರಧಿ ಮಡಿಲಿನಲ್ಲಿ, ನಿಸರ್ಗದ ಆರಾಧನೆ!!

ನನ್ನ ಗೆಲುವು ನಿನ್ನದೆಂದು 

ನಿನ್ನ ನಲಿವು ನನ್ನದೆಂದು 

ಅರಿತು ಬೆರೆತು ನಿಲ್ಲೋ ವಯಸ್ಸು, ಇಂದು ನಾಳೆಗೆ!

 ಹಂಚಿ ಕುಡಿವ ಶುದ್ಧ ಮನಸ್ಸು, ನಮ್ಮ ಬಳಗಕೆ!!

ಪರಮಾತ್ಮನ ಒಳಗೆ ಇಳಿಸಿ 

ನರನಾಡಿಯ ಚುರುಕುಗೊಳಿಸಿ 

ಹರಟೆ ಹೊಡೆವ ಸೂಕ್ತ ಕಾಲ, ಮತ್ತೆ ಸಿಗುವುದೇ?

ನಮಗೆ, ಮತ್ತೆ ಸಿಗುವುದೇ?

ನಡು ನೀರಲಿ ಬಿಟ್ಟು ಹೋದ 

ಭಾವ-ಬಂಧ ಕೆಡಿಸಿ ಹೋದ 

ವ್ಯಕ್ತಿಗತ ಬಳಸಿ ಬರುವ, 

ಹತ್ತು ಹಲವು ಕಥೆಗಳು!

ಅವರಿಗವರದೇ ವ್ಯಥೆಗಳು!!

ಈ ಮಧ್ಯೆ, ಅವರೆಲ್ಲಾ 

ಕ್ಷಣಿಕ ಕಾಲ ದುಃಖ ಮರೆತು ಕುಣಿಯುತ್ತಿದ್ದರು!

ಬದುಕ ಶೂನ್ಯ ಬದಿಗೆ ಸರಿಸಿ ಹಾಡುತ್ತಿದ್ದರು!!

ಆದ್ದರಿಂದ,

ಆಲ್ಕೋಹಾಲಲು ಹಾಲಿದೆ!

ಎಲ್ಲರ ನೋವಲು ಪಾಲಿದೆ!!

~ ಎಂ.ಕೆ. ಹರಕೆ 

ಅವನು - ಅವಳು

ಹೀಗೊಂದು ಸನ್ನಿವೇಶ!!

.

.

 ಅಂಜದೆ ಅಳುಕದೆ ಹಿಗ್ಗದೆ ಕುಗ್ಗದೆ   

 ನಲಿಯುತ ನಗಿಸುತ ಅವನಿದ್ದ!

 ಹಾಗೆಯೇ ಸುಮ್ಮನೆ, ಒಮ್ಮಿಂದೊಮ್ಮೆಲೆ

 ತಲುಪಿತು ಅವಳ ಕಿರುವರದಿ!

 ಮಲೆಗಳ ಸಾಗರ ಹಸಿರಿನ ಬೀಡದು

 ಅವಳಿಗೆ ದೊರೆತ ಗಮ್ಯ ಸ್ಥಾನ!

 ದುಡಿಮೆಯ ಆಗರ, ಟ್ರಾಫಿಕ್ನ ತವರು 

 ಅವನಿಗೆ ಒಲಿದ ಭವ್ಯ ತಾಣ!!

 ಮನಸಲಿ ಕಾತುರ ಬಯಕೆಗಳೆಷ್ಟೋ?

 ಕುತೂಹಲ ಕುಹೂ ಕುಹೂ ಕೂಗುತಿದೆ!

 ಇನ್ಸ್ಟಾ- ಫೇಸ್ಬುಕ್, ಎಲ್ಲೆಡೆ ತೀವ್ರ 

 ಅವಳದೇ ಹುಡುಕಾಟ ನಡೆಯುತಿದೆ !!

ಚಿತ್ರಕೃಪೆ : ಅಂತರ್ಜಾಲ

 ಸಿಕ್ಕಿತೋ ಸಿಕ್ಕಿತು ಎಂದೂ ಕಾಣದ

 ಅಪರೂಪದ ಮಿಂಚಿನ ಅವಳ ಮೊಗ!

 ಉಕ್ಕಿತೋ ಉಕ್ಕಿತು, ಮರುಕ್ಷಣದಲ್ಲಿಯೇ 

 ಪ್ರೇಮದ ರೀತಿಯ ಮಧುರ ಸುಖ!!

 ಧೈರ್ಯದಿ ಚಕ್ಕನೆ, ಇನ್ಸ್ಟಾ ಪುಟದಲ್ಲಿ

 ಕಳಿಸಿದನಾಕೆಗೆ ರಿಕ್ವೆಸ್ಟು!

 ಕಾದನು ಕಾದನು ದಿನರಾತ್ರಿಗಳನು 

 ಬಾರದು ಅವಳ ಅಕ್ಸೆಪ್ಟು!!

 ಬಯಕೆಯ ಬೇಗುದಿ ಸುಂದರ ಸ್ಮರಣಿಕೆ

 ತಿವಿಯುತ ಕುಣಿದವು ಮನದೊಳಗೆ!

 ಅವಸರದಾಹುತಿ; ಅಳುಕಿನ ಅಂಜಿಕೆ

 ಮನೆಮಾಡಿದವು ಅವನೊಳಗೆ!!

 ತಿಳಿಯದು ತೀರದು ಇವರೀರ್ವರ ಕಥೆ

 ಎಲ್ಲಿಗೆ ಹೋಗಿ ಮುಟ್ಟುವುದೋ?

 ಒಂದೇ ಕೌತುಕ, ನನ್ನಯ ಪಾಲಿಗೆ

 ಅವರಿಬ್ಬರ ಮಿಲನ ಎಂದಾಗುವುದೋ?

.

.

.

ಬೇಗ ಆಗ್ಲಿ ಅಷ್ಟೇ, ಏನಂತೀರಾ?

~ಎಂ ಕೆ ಹರಕೆ 

ಮೌನಜ್ವಾಲೆ

ಹಾಡು ಬರೆಯಬೇಕು

ಅಳುವ ಮರೆಯಬೇಕು

ಮಾತು ಮುಗಿದ ಮೇಲೆ

ವಿರಹ ಮೌನಜ್ವಾಲೆ!

ಯಾವ ಭೀತಿಯಲ್ಲಿ

ಯಾರ ಪ್ರೀತಿಯಲ್ಲಿ

ಏನೂ ಹೇಳಲಾರೆನು

ಕೂಡಿ-ಕಳೆಯಲಾರೆನು!

ಅಂದವಾದ ಮೈಸಿರಿ

ಕಳೆದುಕೊಂಡ ವೈಖರಿ

ಬೀಡುಬಿಟ್ಟ ಭಾಗ್ಯವ

ಬಿಡಿಸಿ ಬಿಟ್ಟು ಕೊಟ್ಟವ!

(ಚಿತ್ರಕೃಪೆ: ಅಂತರ್ಜಾಲ)

ಅಂಚಿನಿಂದ ಅಂಜಿಕೆ

ಜಾರಿ ಬಂದ ವೇಗಕೆ

ಮಾತು ಮೌನವಾದವು

ಬಯಕೆ ದೂರವಾದವು!

ಏನು? ಎಂತ ? ಎಲ್ಲಿಗೆ?

ಘಮಿಸಿ ಹೋದೆ ಮಲ್ಲಿಗೆ

ನೆನೆದು ಬಿಕ್ಕಲಾರೆನು

ಅಳಿಸಿ ಉಳಿಯಲಾರೆನು!

ಭಾವ ಬಳಸಿ ಬಂದೆ ನೀ

ಬದುಕ ತಿಳಿಸಿ ಹೋದೆ ನೀ

ಮನಸ ಬೀದಿಯಲ್ಲಿ

ಅಡಗು ತಾಣವೆಲ್ಲಿ?

~ ಎಂ.ಕೆ.ಹರಕೆ

ಅಭಿಮಾನಿ

ನಿನಗಾಗೆ ನನ್ನೊಲವು  ಬರೆಯುತಿದೆ ಓ ಗೆಳತಿ

ನನಗಾಗಿ ಒಂದೊಮ್ಮೆ ; ಓದೇ ಒಲವಿನ ಒಡತಿ!!

ಕಾಯಿಸಿ ಕಾಯಿಸಿ ನೀ

ಕಾಯಿಲೆಯ ಬರಿಸದಿರು

ಕಾಯುವ ಎಣ್ಣೆಯಲಿ

ನನ್ನೆದೆಯ ಕುದಿಸದಿರು!!

ಅದೃಷ್ಟವೋ ಅವಕಾಶವೋ 

 ಅವತರಿಸಿದೆ ಕಣ್ಮುಂದೆ

ಹೊಂಬೆಳಕ ರಶ್ಮಿಯಲಿ

ನಸುನಗೆಯ ಚುಂಬಿಸಿದೆ !!

  (ಚಿತ್ರಕೃಪೆ: ಅಂತರ್ಜಾಲ)

ಮೇಕಪ್ಪಿನ ಮಹಾಪಾಪ

ನಿನ್ನ ವದನಕೆ ಬೇಕಿಲ್ಲ

ಸಿಂಗಾರದ ಸಂಕೋಲೆ

ನಿನ್ನ ಸಿರಿಗೆ ಸಮವಿಲ್ಲ !!

ಮೌನದ ಮಾತಲ್ಲೇ 

ನಿನ್ನ ಗುಂಗ ಹಿಡಿಸಿದೆ!

ಇಂಪಾದ ಹಾಡಲ್ಲೇ

ನನ್ನ ಹೃದಯ ತಣಿಸಿದೆ!!

ಅನುದಿನವು ಅನುಕ್ಷಣವು

ಅಭಿಮಾನಿಯೇ ನಾ ನಿನಗೆ

ಅನವರತ ಪ್ರೇಮದಲಿ

ಹಾಡುವೆಯಾ? ನೀ ನನಗೆ!!

~ ಎಂ. ಕೆ. ಹರಕೆ

ನಶಾ ಪ್ರಪಂಚ

                  ( ಚಿತ್ರಕೃಪೆ: ಅಂತರ್ಜಾಲ )

ಅಬ್ಬಬ್ಬಾ 

ಏನ್ ಆ ಗುಂಡು ಆ ತುಂಡು!

ತುಂಡುಡಿಗೆಯ ಮಿರಿಮಿರಿ ನರ್ತನ!

ನಶೆಯ ಲೋಕವೋ ಅಥವಾ 

ಲೋಕದಲ್ಲೆಲ್ಲೂ ಸಿಗದ ನಶಾ ತಾಣವೋ!!

ಇದು ಧ್ವನಿ ಪ್ರಪಂಚವೇ?

ಇಲ್ಲ ಇಲ್ಲ..

ಅರ್ಥವಾಗದ ಭಾಷೆಯ, 

ಗೊತ್ತು ಗುರಿಯಿಲ್ಲದೆ ಸಾಗುವ,

ಬಿಡುವಿಲ್ಲದೆ ಕುಣಿಯಲು ಯೋಗ್ಯ,

ಕರ್ಣಪಟಲ ಅದುರುವಂತ ಕರ್ಕಶ ಶಬ್ಧ!

ಇದು ನಾಟ್ಯ ಪ್ರಪಂಚವೇ?

ಇಲ್ಲ ಇಲ್ಲ...

ಕೆಲವೊಮ್ಮೆ ತಾಳಕ್ಕೆ ತಕ್ಕ ಹೆಜ್ಜೆ,

ಒಮ್ಮಿಂದೊಮ್ಮೆಲೇ ಎಣೆಯಿಲ್ಲದ ಕುಣಿತ,

ಮತ್ತೊಮ್ಮೆ ನೀರಸ ಮೌನ..

ಮಗದೊಮ್ಮೆ ಒಂದಡಿ ಭೂಮಿಯೇ 

ಕೆಳ ಕುಸಿಯುವಂತ ದಾಂಡಿಗ ಹೆಜ್ಜೆಗಳು!!

ಇದು ಹುಚ್ಚರ ಪ್ರಪಂಚವೇ?

ಇಲ್ಲ ಇಲ್ಲ...

ಇಲ್ಲಿ ಬಂದವರು ದೊಡ್ಡ ದೊಡ್ಡ ಮಂದಿ

ಕೆಲವರು ಜನಪ್ರತಿನಿಧಿಗಳು,ಆರಕ್ಷಕರು..

ಇನ್ನೂ ಕೆಲವರು ಬಿಜಿನೆಸ್ ಭಯೋತ್ಪಾದಕರು,

ಒಂದಿಷ್ಟು ಮಂದಿ ದುಡ್ಡಿನ ಅಹಮ್ಮಿಗಳು

ಬಹಳಷ್ಟು ಮಂದಿ ವಿದ್ಯಾವಂತರೆ! 

ಇದು ಆನಂದ ಪ್ರಪಂಚವೇ?

ಇಲ್ಲ ಇಲ್ಲ...

ಜೊಲ್ಲು ಸುರಿಯುತ್ತಿದ್ದರೂ ಉಪ್ಪಿನಕಾಯಿ ನೆಕ್ಕುವ,

ಅರೆಪ್ರಜ್ಞನಾದರೂ ಮೇಲಿಷ್ಟು ಪರಮಾತ್ಮನ ಇಳಿಸುವ,

ಇಬ್ಬರು ಭುಜವನ್ನು ಹಿಡಿದು ನಡೆಸಿದರೂ ನಡೆಯಲಾಗದ,

ತಿಂದಿದೆಲ್ಲವನ್ನೂ ಕಾರು ಹತ್ತುವ ಮುನ್ನವೇ ಕಕ್ಕಿ,

ಪೆಕ್ರನಂತೆ ನಗುವ ಇವರಿಗೆಲ್ಲಿಯದು ಆನಂದ?

ಇವರನ್ನು ಹೊತ್ತು ಮನೆಸಾಗಿಸುವವರಿಗೆ ಯಾವ ಕರ್ಮ?

ಮತ್ತೆಂತ ಪ್ರಪಂಚವಿದು?

ರಾತ್ರಿ ಎನ್ನದೆ, ಹಗಲೆನ್ನದೆ

ವಾರವಿಡೀ ಕಂಪ್ಯೂಟರಿನಂತೆ ಕೆಲ್ಸ ಮುಗಿಸಿ,

ಸರ್ವಿಸಿಗೆ ಕೊಟ್ಟ ವಾಹನ ತೊಳೆದಂತೆ

ಅಡಿಯಿಂದ ಮುಡಿವರೆಗೆ 

ದೇಹದ ಕಲ್ಮಶಗಳನ್ನು, ಕಹಿ-ಕಂಪನಗಳನ್ನು, 

ಒಟ್ಟಾರೆ

ವಾರದ ಪೂರ್ತಿ ಒತ್ತಡವನ್ನು ತೊಳೆಯುವ ತಂತ್ರ!

ನೀವು ಉಡುವ, ತೊಡುವ,

ಉಣ್ಣುವ, ಕಕ್ಕುವ ಹಣವೆಲ್ಲ ನಿಮ್ಮ ದುಡಿಮೆಯದೆ!

ಆದರೆ,

ನಿಮ್ಮಿಂದ ಪೋಲಾಗುವ

ಗುಣಮಟ್ಟದ ಆಹಾರ, 

ಎಗ್ಗಿಲ್ಲದೆ ಉರಿಸಿದ ಇಂಧನ,

ಗುಂಗಿನಲ್ಲಿ ಒದರಿಸಿದ ಕರ್ಕಶ ಶಬ್ಧ ಇತ್ಯಾದಿ ನಿಮ್ಮದೇ??

ನಿಮ್ಮ ನಶಾ ಪ್ರಪಂಚ

ದುಡಿಯುವ ವರ್ಗ ಬೆವರಿಳಿಸಿ ಉತ್ಪಾದಿಸಿದನ್ನು

ಕ್ಷಣ ಮಾತ್ರದಲ್ಲೇ ಇಲ್ಲವಾಗಿಸುವ ನಾಶ ಪ್ರಪಂಚ!!

ನೀವು ಒಂದು ರಾತ್ರಿಯಲ್ಲಿ

ಬಳಸುವ ಸಂಪನ್ಮೂಲ,

ಬೇಕಾಬಿಟ್ಟಿ ವ್ಯಯಿಸಿದ ಖರ್ಚಿನಲ್ಲಿ 

ಕೂಳಿಲ್ಲದೆ, ಸೂರಿಲ್ಲದೆ ಕೊರಗುವ

ಒಂದು ಬಡ ಹಳ್ಳಿಯನ್ನು ಉದ್ಧರಿಸಬಹುದಿತ್ತು!!

~ಎಂ.ಕೆ.ಹರಕೆ

'ದಣಿ'ವು

ದಣಿವಾರಿಸುವ ಮನವೇ ದಣಿವೆಂದು ಮಲಗಿರುವಾಗ,

ದಣಿವು ನೀಗಿಸಲು ನೀನಾರ ಕೃಪೆ ಕೋರುವೆ?

ದಿಕ್ಕು-ದೆಸೆಯಿಲ್ಲದ ಅಜ್ಞಾತ ವಾಸವ ತೊರೆದು

ಕರೆದು ಕೂಡಿಕೊ, ದೈವ ಕೃಪಾಪೋಷಿತ ನಾಟಕದಲಿ!!

      ( ಚಿತ್ರ ಕೃಪೆ: ಅಂತರ್ಜಾಲ)

ದಣಿವಿಕೆಗೆ ಬಳಲಿ ನೀ, ಸೊರಗಿ ನೀರಾದರೆ

'ದಣಿ' ಎಂಬ ಸಂಭೋದನೆ ನಿನ್ನೊಡಲ ಅರಸದು!

'ಆಳಾಗಿ ದುಡಿ, ಅರಸನಾಗಿ ಉಣ್ಣು' - ಎಂಬಂತೆ

ದಣಿಯ ಗದ್ದುಗೆಗೆ 'ದಣಿವೇ' ಮೂಲಾಧಾರ!

ದಣಿವೆಂಬುದು ಒಡಲೊಳಗೆ ಕ್ಷಣ ಕ್ಷಣಕೂ ಹೆಚ್ಚುವುದು

ಧನಾತ್ಮಕ ಚಿಂತನದ ಹೊರತು, ಇದರಳಿವಿಗೆ ಎಣೆಯಿಲ್ಲ!

ದುಡಿದು-ದುಡಿದು ನೀ ದಣಿವನ್ನೇ ಸತಾಯಿಸಿ ನೋಡು

ದಣಿವಿಗೂ ಬ್ಯಾಸರಾಗಿ ಕಡೆಗೆ, ನಿನ್ನೊಡಲ ಬಿಟ್ಟೋಡುವುದು!

                                                   ~ಎಂ.ಕೆ.ಹರಕೆ

ಪುನಃ ಹಾಡಿತು....

ಭಾವ ಭಾವಗಳ ಸುಳಿಯಲ್ಲಿ
ಮಿಂದೇಳುವ ಓ ಮನವೇ....
ಕ್ರಮಿಸಿದ ದೂರವ ನೆನೆದು ದುಃಖಿಯಾಗಬೇಡ..
ಉಳಿದ ಪಥವನು ಕಂಡು ನಿಟ್ಟುಸಿರನು ಬಿಡಬೇಡ....

ಭಾವನೆಗಳ ಸಾಗರವೇ ಸಾರ್ಥಕ ಬದುಕಿಗೆ ಸಾಕ್ಷಿ
ಪ್ರತಿ ಭಾವದಂಚಿನಲೂ ತೆರೆದಿರಲಿ ನಿನ್ನ ಅಕ್ಷಿ.....
ನೋಡುವ ಕಂಗಳಿಗೆ ಕಂಡರೂ ಬಹುರೂಪ
ಚಿಂತನ-ಮಂಥನದಿಂದ ಕಾಣ್ವುದು ಕಟುಸತ್ಯ.....

ಪರಿಪರಿಯಾಗಿ ಪಾಡುತಿದೆ, ಹೃದಯಾಂತರಾಳ...!
ಏನಾಗಿದೆ, ನಿನಗೆ ಸರಿಯಾಗಿಸು ನಿನ್ನ ಬದುಕೆಂದು..!!
ಎಲ್ಲಿ ನಿನ್ನಯ ನಿಷ್ಠೆ, ಎಲ್ಲಿ ನಿನ್ನಯ ಶ್ರಮ?
ಎಲ್ಲಿ ಅಡಗಿತು ಆ ನಿನ್ನ ಹೊಸ ವರ್ಷದ ಸಂಕಲ್ಪ??
                                               

                       
ಪುನಃ ಹಾಡಿತು..........
ಸತ್ಯಕ್ಕೆ ಎದೆಗುಂದದೆ, ಸುಳ್ಳಿನ ಬಳಿಜಾರದೆ;
ದಾಸ್ಯಕ್ಕೆ ಸಿಲುಕದೆ, ಮೋಹಕ್ಕೆ ಬಲಿಯಾಗದೆ;
ಸಿಟ್ಟಿಗೆ ನೀ ಸುಡದೆ, ಲೋಭಕ್ಕೆ ಮರುಳಾಗದೆ;
ಸವೆಸು ಈ ದೇಹವ ಪರಮಾತ್ಮನ ಪರಿಕಲ್ಪನೆಯಲ್ಲಿ...
       
                                      ~ಎಂ.ಕೆ. ಹರಕೆ

       

ನಿರಾಳತೆ

ನಿದ್ರೆ ಬಾರದ , ಅರೆ ಮುಚ್ಚಿದ ಕಂಗಳಲಿ
ನೂರಾರು ಸಿಹಿ ಆಲೋಚನೆಗಳು...
ಆಹ್ಲಾದಕರ ಶುಭ ಸಂಜೆಯ ಕ್ಷಣಗಳು
ಬೆಳದಿಂಗಳ ಶಶಿಯಂತೆ ಬೆಳಗುತಿವೆ...

ಚಿತ್ರಕೃಪೆ : ಅಂತರ್ಜಾಲ 

ಆಹಾ! ಇದೆಂಥಾ ನಿರಾಳತೆ,
ಕೆಲಸ-ಕಾರ್ಯದ ಗೋಜುಗಳಿಲ್ಲ;
ತಡಬಡಾಯಿಸಿ ಓಡುವ ಅಗತ್ಯವಿಲ್ಲ;
ಸಂದಿಗ್ಧ ಸವಾಲುಗಳ ಸಹವಾಸವೇ ಇಲ್ಲ!!

ನಾಳಿನ ಚಿಂತೆಯ ಚಿಂತನವೆಲ್ಲಿ?
ನೆನ್ನೆಯ ಕಾರ್ಪಣ್ಯ ಸವೆದವರಾರು?
ಇಂದಿನ ಸುಖ-ಸಂತಸ,ಶುದ್ಧತೆ
ಜಂಜಾಟದ ಮನಸ್ಥಿತಿಯ ಬಡಿದೋಡಿಸಿರಲು!!!

ಹೃದಯ ಸ್ಪರ್ಷಿ ಪ್ರೀತಿ-ಮಮತೆ,
ನಿಷ್ಕಲ್ಮಷ ಆವ-ಭಾವ;
ಅಳತೆಯಿರದ ತುಸು ದುಡಿಮೆಗೆ
ಮನದಾಳವಾಯಿತು ಬಲು ಹಗುರ...

                                -ಎಂ.ಕೆ.ಹರಕೆ

ಮಲೆನಾಡ ಮಧುರತೆ

ಹಸಿರು ಹುಲ್ಲಿನ ಮುದ್ದಾದ ಗಿರಿಧಾಮಗಳೆ,

ನಿಮ್ಮನ್ನು ಸೃಷ್ಟಿಸಿದ ನಿರ್ಮಾತೃ ಅವನಾರು?

ಹಸಿರನ್ನೇ ಹೊದ್ದ ಮಲೆನಾಡ ತಾಯೇ,

ನಿನ್ನೀ ಸೌಂದರ್ಯಕ್ಕೆ ಸರಿಸಾಠಿ ಯಾರು?

ಮಲೆನಾಡ ಮಧುರತೆ ಜನ-ಮನವನು ತಣಿಸಿದೆ 

ಹಿಂಬಾಲಿಸಿ ಸಾಗಿದ ದಾರಿ,ಕಣ್ತುಂಬ ಕುಣಿದಿದೆ…

ಅಂಭುಜದ ರವಿಮಾಮ ಕಣಿವೆಯೊಳ್ ಅವಿತಿರಲು

ನಮ್ಮ ಆಗಮನ ಅರಿತು,ನಾಚುತ ಹೊರಬರುತಿಹನು…

ಕಾಫಿಯ ಘಮಘಮ ಗಮನವನು ಸೆಳೆದಿರಲು

ಉಪ್ಪಿಟ್ಟಿನ ಸ್ವಾದಕೆ ನಾಲಿಗೆ ಹದಗೊಂಡಿದೆ…

ಓಡಾಡಿದ ಕಾಲ್ಗಳು ದಣಿವನ್ನೇ ಮರೆತಿರಲು

ಸೌಂದರ್ಯೋಪಾಸನೆಯ ಸವಿಗೆ ಮೈಮರೆತು ಸಾಗಿವೆ…

ಜುಳು-ಜುಳು ಸ್ವರನಾದ ಕಿವಿಯೊಳ್ ಗುಣುಗುತ್ತಿರಲು

ಆಲಿಸಿದ ಮನವೀಗ ನೀರಿನೊಳ್ ಧುಮುಕಿದೆ..

ಜಾರುವ ಬಂಡೆಗಳಲಿ ಮೀಯುವುದೇ ಮಹಾಭಾಗ್ಯ

ಮಹಾಮಜ್ಜನದನುಭವವನು ಪಡೆದವನೇ ಧನ್ಯ!!

    -ಎಂ.ಕೆ.ಹರಕೆ  

ಕಾವ್ಯ ಲಹರಿ

   

             ■ ಟ್ರಾಫಿಕ್ ಬದುಕು ■

ಬರಿದಾದ ಬದುಕಲೀ ನಾ ಏನ ಹೇಳಲಿ?

ತುಂಬಿದ ಗಾಡಿಯು ನಿಂತಿದೆ ನಡುದಾರೀಲಿ!!

ಮುಂದಕ್ಕೆ ಹೋಗದು; ಹಿಂದಕ್ಕೆ ಬಾರದು

ಆದರೂ ಸೌಖ್ಯವಿದೆ ಈ ಬಾಳ ಪಯಣದಲಿ..

ನೂರಾರು ಗಾಡಿಗಳು ಅಡಿಗಡಿಗೆ ನಿಂತಿವೆ,

ಮುಂದಾಗಿ ನಾಮುಂದು ತಾಮುಂದು ಎನ್ನುತಿವೆ!

ಬಿಳಿಪಟ್ಟಿಯ ಹಾದೀಲಿ ಸಾಗುವುದೇ ಬಲುಮೇಲು

ಯಾಕಯ್ಯ? ಈ ಬೇನೆ ಕತ್ತ ಹಿಸುಕಿದಂತಿದೆ...!

ಹಿಂದಿದ್ದ ಮೋಟಾರೀಗ ಪಕ್ಕದಲಿ ನಿಂತಿದೆ

ಮುನ್ನುಗ್ಗುವ ಬರದಲ್ಲಿ ಪೈಪೋಟಿ ನೀಡುತಿದೆ..

ಬಸ್ಸಾದರೇನು?ಕಾರಾದರೇನು? ಭಗವಂತನ 

ಈ ಬವಣೆಯ ಅನುಭವಿಸದೆ ವಿಧಿಯಿಲ್ಲ!!

ಕೆಲವೊಮ್ಮೆ ಹೀಗನ್ನಿಸುತ್ತದೆ...

ಮೋಟಾರು ಬಿಟ್ಟು ನಡೆದೇ ನಾ ಗುರಿಮುಟ್ಟಲೇ?!

ಮರುಕ್ಷಣವೇ.... ಆತ್ಮಾವಲೋಕನ-

"ನಿಸರ್ಗ ನಿಯಮ ಉಲ್ಲಂಘಿಸಿ ಬಾಳು ಸಾಗಲು ಸಾಧ್ಯವೇ?"

                         

                               -ಎಂ.ಕೆ.ಹರಕೆ

                   ◆  ರೈತನ ದನಿ ◆

ಕೇಳಿಸಿತು ಈ ಕಾಲದಿ ಅನ್ನದಾತನ ಅಳಲು

ಹೊರಟಿತು ಎನ್ನಯ ಕಾಯ ಅವನಿದ್ದ ಕಣರಂಗಕೆ....

ಮನಸ್ಸಿಲ್ಲದೆ ಸಾಗಿದ ಈ ಹೃದಯ ಬಾಗಿಲು

ತೆರೆಯಿತು ಮರೆಯಲ್ಲಿ ನಿಧಾನ ಕೃಷಿ ಕಾಯಕಕ್ಕೆ...

ಕೃಷಿ ಕೇವಲ ರೈತನಭ್ಯುಯದ ಕಾಯಕವಲ್ಲ 

ರಿಷಿ-ಸಂತರೂ ಕೈಮುಗಿದು ಸೇವಿಪ ಭಿಕ್ಷಾನ್ನ...

ಪ್ರತಿ ಜನ-ಮನವೂ ದಿನನಿತ್ಯ ಭೋಗಿಸುವ ಆಹಾರ 

ರೈತನ ಬೆಳೆಯಿಂದಲೇ ಜಾನುವಾರಗಳಿಗೂ ಮೇವು...

ರೈತ........?

ತೀಕ್ಷ್ಣ ವಿಷಯದಿ ಬೆರೆತು ತಾ ಮೈಮರೆಯಲಾರ

ಅವನ ಕಾರ್ಯದಲಿ ವಿಜ್ಞಾನ ಅಡಗಿರುವುದವನಿಗರಿವಿಲ್ಲ...

ಭತ್ತ ಕೇರುವ ಮುನ್ನ ಸಾಂದ್ರತೆ ಪರೀಕ್ಷಿಸಲಾರ

ಆದರೂ ಮಹಾಜ್ಞಾನವಂತನು ಕೃಷಿ ವಿಜ್ಞಾನ ಭೋದೆಯಲಿ....

ರಸಋಷಿಯ ಕಾವ್ಯದಲಿ ರೈತ-ನೇಗಿಲಯೋಗಿ

ಕಾಯಕದಲ್ಲೇ ದೇವರ ಕಾಣುವ ಮಹಾತ್ಯಾಗಿ....

ಪರಿಶ್ರಮದ ಕೂಸಾಗಿ ಗೇಯುವನು ಪ್ರತಿನಿತ್ಯ 

ಕಿಂಚಿತ್ತೂ ತನಗಾಗಿ ಗಳಿಸಿಲ್ಲ ಇದು ಸತ್ಯ....

ಸೈನಿಕನ ಆರ್ಭಟ ಕೇಳ್ಪುದು ರಣರಂಗದಲಿ

ರೈತನ ಹೋರಾಟ ತಾ ದುಡಿವ ಕಣದಂಗಳದಲಿ...

ಶಾಸ್ತ್ರಿಯ ಘೋಷಣೆಗೆ ಇವರೀರ್ವರೆ ಸ್ಫೂರ್ತಿ

ಕಣ-ಕಣದಲೂ ಮೊಳಗಲಿ "ಜೈ ಜವಾನ್, ಜೈ ಕಿಸಾನ್"..

                        

                                         -ಎಂ. ಕೆ. ಹರಕೆ

              ■ ಪ್ರೇಮಾಂತರಂಗ ■

ಸಹಸ್ರಾರು ದ್ವೀಪ,ಸುರಂಗ,ಮಾಯಾಲೋಕವೆ

ಎದುರಾದರೂ ನಾ ನಿನ್ನ ಬಿಡೆನು ಗೆಳತಿ...
ಬಾರದ ಲೋಕಕ್ಕೆ ಹೊರಟರೂ ನಿನ್ನ ನಾ,ಬಿಡದೆ
ಹಿಂಬಾಲಿಸುವೆ ಪ್ರೇಮಮುಗ್ಧನಂತೆ...
ನಿನ್ನ ಆ ಮೊದಲ ತೊದಲು ಮಾತೇ ಸಾಕು ಎನ್ನ 
ಈ ಹೃದಯಾಂತರಂಗಕೆ....
ನೀನಾಗೆ ಬಾ ಗೆಳತಿ ಎನ್ನ ಹೃದಯ ಮಂದಿರಕೆ
ಪೂಜೆಯ ವೇಳೆಗೆ ನೀ ತಡಮಾಡದೆ 

ಒಲುಮೆಯ ಘಂಟೆಯನು  ಬಾರಿಸುವೆ ಅನುಕ್ಷಣದಿ,

ನಿನ್ನೊಂದಿಗೆ ನಾನಿರುವ ಪ್ರತಿಗಳಿಗೆಯಲೂ...

ಕನಸು-ಮನಸುಗಳು ಬೆರೆತು ಹರುಷದಿ ಕುಣಿದಿರಲು ಪ್ರೇಮಾತರಂಗವು ಭಯದಿಂದ ಕುದಿಯುತಿರೆ...

ಎಲ್ಲಿ ನೀ ನನ್ನ ತ್ಯಜಿಸಿ ಪೋಗುವೆಯೆಂದು  ತನ್ನ 

ತಾನೇ ಬೇಲಿಯನ್ನು ಕಟ್ಟಿಕೊಂಡಿದೆ...

                                  -ಎಂ.ಕೆ.ಹರಕೆ

ಪ್ರಕೃತಿಯ ತಂಪು

ಅತೀವ ತಂಪಿನ ಹಸಿರಾದ ಪ್ರಕೃತಿಯು ಮರೆಯಾದ
ಭಾಸ್ಕರನ ಸ್ವಾಗತಿಸುತಲಿತ್ತು...
ಹನಿಹನಿಯಾಗಿ ಉದುರುವ ಮಂಜಿನ ಹನಿಗಳು
ಮನದ ಅರಿಕೆಯ ಬಡಿದೆಬ್ಬಿಸುತಲಿತ್ತು...

ದೂರದೀ ಎಲ್ಲೋ ಸಂಗೀತದಲೆಗಳು ಕಾಣದ
ಕಣ್ಣಿಗೆ ಅಪ್ಪಳಿಸಿದಂತಿತ್ತು!!
ಬೆಚ್ಚಗೆ ಪಕ್ಕದಲಿ ಮಲಗಿದ್ದ ಕುನ್ನಿಯ ಅಪ್ಪುಗೆಯ
ಕಾವು ಹೃದಯದೊಳ್ ಏರುತ್ತಲಿತ್ತು...

ಹೊರಸಲಿನ ಮುಂಭಾಗ ಹೂತಿದ್ದ ಕಂಬವು
ಪವನನಾರ್ಭಟಕ್ಕೆ ಜೋಲಾಡುತಿತ್ತು..
ನಭದಿಂದ ಹೊರಟ ಮಿಂಚಿನ ಕಿರಣಗಳು
ನಾಮುಂದು ತಾಮುಂದು ಎನ್ನುತಲಿತ್ತು...   
              
ಮೇಘಗಳ ತಿಕ್ಕಾಟಕ್ಕೆ ಹೆದರಿದ ಮಳೆರಾಯ
ಕೇರಿಯ ಕೆರೆಯಲ್ಲಿ ತಲ್ಲೀನನಾದ...
ವರುಣನ ರೌದ್ರನೃತ್ಯಕ್ಕೆ ಒಲೆರಾಯ ನೆನೆ-ನೆನೆದು
ಉರಿಯದೆ ಸುಮ್ಮನಾದ...

ಸುಳಿವೇ ನೀಡದೆ ಒಡನೆ ಬಂದಂತ ವರುಣನ
ಆರ್ಭಟ ಕೇಳುವ ಮಹನೀಹನಾರು?
ದೀಪದ ಬೆಳಕಿಗೆ ಕಣ್ಣಾಗಿ ಕುಳಿತಿರುವ ಹೊಂಬೆಳಕ
ಚೆಲುವೆ ಹೇಳೇ ನೀನಾರು!??

                                     ●ಎಂ.ಕೆ.ಹರಕೆ

ಪರಿಭ್ರಮಣೆ..!

 ◆ಪರಿಭ್ರಮಣೆ◆

        ಪರಿಭ್ರಮಿಸು ಎನ್ನೆದೆಯ 

ಒಡಲ ಸುತ್ತುವರೆದು ನಾ ಬೇಡವೆಂದರೂ

            ನೀ ಪೋಗದೆ....

         

       ಕಳವಳದಿ ನಿಟ್ಟುಸಿರ

ಬಿಡದೇ ಪಾಡುವೆ ನಿನ್ನ , ಒಡಲಾಳ

      ಒಂಚೂರು ಬಿಡದೆ..

         

       ಹೊಚ್ಚ ಹೊಸ ಭಾವನೆಯ 

ಮೆಲುಕು ಹಾಕುವ ಮನಕೆ ಸಾಂಗತ್ಯ

       ಕಲ್ಪಿತ ಭಾಗವಾಗಿ....

ಬಾದೇವಿ ಸರಸ್ವತಿಯೇ

ಹೃದಯಾಂತರಾಳಕೆ ಉದಯಿಸಿದ ಸ್ವರವು

        ಕೈ ಜಾರುವ ಮುನ್ನ..

                   

                          -ಎಂ.ಕೆ.ಹರಕೆ

ಅಪ್ಪನ ಅಂಗಿ

                (ಚಿತ್ರಕೃಪೆ: ಅಂತರ್ಜಾಲ)

ಮರೆಯುವುದು ಹೇಗೆ ಬೆಳೆದ ಆ ದಿನಗಳು? 

ಅಪ್ಪನ ದುಡಿಮೆಯಿಂದ ಸಾಗಿದೆ ನಮ್ಮೀ ಬಾಳು! 

ಉಟ್ಟೆವು,ಉಂಡೆವು ಮೂರೊತ್ತು ತಪ್ಪದೆ 

ಕಾಣದೇ ಕಲಿತೆವು ಒಂದೆರಡಕ್ಷರ||

ಶಾಲೆ-ಕಾಲೇಜು ಕೇಳಿ ಕಲಿಯದ ಮಹಾಜ್ಞಾನಿ 

ನಮ್ಮ ಕಲಿಕೆಗಾಗಿ ಬಸಿಯುತಿಹನು ಬೆವರ ಹನಿ 

ಅಂದಿನಿಂದ ಇಂದಿನವರೆಗೂ ಹರಿದಿಲ್ಲ ನಮ್ಮ ಅರಿವೆ 

ಹೊಲಿದ ಅಂಗಿಯ ತೊಟ್ಟು ತಾನ್ ನಗುವನು ಹರಿದಿಲ್ಲೆಂದು!!

ಪ್ರತಿನಿತ್ಯ ಅನುಕ್ಷಣದಿ ಕಾಯಕದೇ ಜಪ-ತಪ 

ಆಗಾಗ ಒಂದಿಷ್ಟು ಕಾಳಜಿಯ ಪರಿತಾಪ 

ಸಿಟ್ಟಾಗಲಿ, ಮುನಿಸಾಗಲಿ ಬರೀ ಕ್ಷಣಕೆ ಮಾತ್ರವೇ 

ಬಂಗಾರದ ನನ್ನಪ್ಪನ ಕಾಯೋ ನೀ ಶ್ರೀ ಹರಿಯೇ ||

                                                                ~ಎಂ.ಕೆ.ಹರಕೆ