ಹೀಗೊಂದು ಸನ್ನಿವೇಶ!!
.
.
ಅಂಜದೆ ಅಳುಕದೆ ಹಿಗ್ಗದೆ ಕುಗ್ಗದೆ
ನಲಿಯುತ ನಗಿಸುತ ಅವನಿದ್ದ!
ಹಾಗೆಯೇ ಸುಮ್ಮನೆ, ಒಮ್ಮಿಂದೊಮ್ಮೆಲೆ
ತಲುಪಿತು ಅವಳ ಕಿರುವರದಿ!
ಮಲೆಗಳ ಸಾಗರ ಹಸಿರಿನ ಬೀಡದು
ಅವಳಿಗೆ ದೊರೆತ ಗಮ್ಯ ಸ್ಥಾನ!
ದುಡಿಮೆಯ ಆಗರ, ಟ್ರಾಫಿಕ್ನ ತವರು
ಅವನಿಗೆ ಒಲಿದ ಭವ್ಯ ತಾಣ!!
ಮನಸಲಿ ಕಾತುರ ಬಯಕೆಗಳೆಷ್ಟೋ?
ಕುತೂಹಲ ಕುಹೂ ಕುಹೂ ಕೂಗುತಿದೆ!
ಇನ್ಸ್ಟಾ- ಫೇಸ್ಬುಕ್, ಎಲ್ಲೆಡೆ ತೀವ್ರ
ಅವಳದೇ ಹುಡುಕಾಟ ನಡೆಯುತಿದೆ !!
 |
| ಚಿತ್ರಕೃಪೆ : ಅಂತರ್ಜಾಲ |
ಸಿಕ್ಕಿತೋ ಸಿಕ್ಕಿತು ಎಂದೂ ಕಾಣದ
ಅಪರೂಪದ ಮಿಂಚಿನ ಅವಳ ಮೊಗ!
ಉಕ್ಕಿತೋ ಉಕ್ಕಿತು, ಮರುಕ್ಷಣದಲ್ಲಿಯೇ
ಪ್ರೇಮದ ರೀತಿಯ ಮಧುರ ಸುಖ!!
ಧೈರ್ಯದಿ ಚಕ್ಕನೆ, ಇನ್ಸ್ಟಾ ಪುಟದಲ್ಲಿ
ಕಳಿಸಿದನಾಕೆಗೆ ರಿಕ್ವೆಸ್ಟು!
ಕಾದನು ಕಾದನು ದಿನರಾತ್ರಿಗಳನು
ಬಾರದು ಅವಳ ಅಕ್ಸೆಪ್ಟು!!
ಬಯಕೆಯ ಬೇಗುದಿ ಸುಂದರ ಸ್ಮರಣಿಕೆ
ತಿವಿಯುತ ಕುಣಿದವು ಮನದೊಳಗೆ!
ಅವಸರದಾಹುತಿ; ಅಳುಕಿನ ಅಂಜಿಕೆ
ಮನೆಮಾಡಿದವು ಅವನೊಳಗೆ!!
ತಿಳಿಯದು ತೀರದು ಇವರೀರ್ವರ ಕಥೆ
ಎಲ್ಲಿಗೆ ಹೋಗಿ ಮುಟ್ಟುವುದೋ?
ಒಂದೇ ಕೌತುಕ, ನನ್ನಯ ಪಾಲಿಗೆ
ಅವರಿಬ್ಬರ ಮಿಲನ ಎಂದಾಗುವುದೋ?
.
.
.
ಬೇಗ ಆಗ್ಲಿ ಅಷ್ಟೇ, ಏನಂತೀರಾ?
~ಎಂ ಕೆ ಹರಕೆ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ